ئێوارەی دوێنێ، واتە تەنها نزیکەی هەشت سەعات بەر لە شەهید بوونی، سەرۆک و نوێنەری ڕاستەقینەی گەلی فەلەستین، ئیسماعیل هەنیە، لە لێداونێکیدا زۆر بە جوانی و ورە بەرزانە شیکاریی بۆ قەوارەی زایۆنی‌‌و شارستانیەتە لەرزۆکەکەی کرد، من پێم وایە لەسەرەتای ئەم وتارەدا، بەو پەرەگرافە دەست پێبکەم، باشترین دەبێت:
" بەرگری زۆر شانازی پێ بەخشیوین، گەلانی مسوڵمان پێیان وایە قودس چەقی ململانێیە لەگەڵ داگیرکاری زایۆنی، قودس ڕووگەی یەکەمیانە ... شارستانیەتی مرۆڤانە لەم ناوچانەوە سەری هەڵداوە، لەم گەلانەوە سەری هەڵداوە، ئەمڕۆ هێندێک هەوڵ هەیە بۆ ئەوەی شارستانێتی ساختە دروست بکەن، بەڵام ئەو شارستانێتییە ساختانە لەسەر بنەمای کوشتن‌و ڕشتنی خوێن‌و دزین‌و بە تاڵانبردنی موڵک‌و ماڵی گەلان و داگیرکاری زەویی گەلان دروست بوون، ئەو شارستانێتیانە ساختەن، ناتوانن بمێننەوە، مانەوەو بەردەوامی بۆ ئەو شارستانێتیانەیە کە لە شەریعەتی ئاسمانی و بەها مرۆڤایەتییەکانەوە سەرچاوەیان گرتووە".
هەنیە سەرۆکی مەکتەبی سیاسی (بزووتنەوەی بەرگری ئیسلامی فەڵەستینی) ناسراو بە (حەماس) لە ماوەی ساڵانی خەباتیدا، بە هێمنیەکەی، بەردەوامیەکەی، جێیگرییەکەی لەسەر بنەما چەسپاوو نەگۆڕەکان، بیروباوەڕە قوڵەکەى بە کێشەى گەلەکەى، توانیبووی نوێنەرایەتیەکی جوانی گەلی بەرگریکاری فەڵەستینی بکات، پەیوەندییەکی فراوان لەگەڵ دونیای دەرەوە دروست بکات، بەتایبەت لەگەڵ گەلانی مسوڵمان‌و بزووتنەوە ئازادیخوازەکانی دونیا.
ئەو تەنها سەرکردەیەک نەبوو لە دوو توێی وتاری ئاگریندا جۆش‌و خرۆش وەبەر سەرکردەو سەربازە بەرگریکارە فەڵەستینیەکان بدات و خۆى تەنها لە دوورەوە تەماشاکار بێت، بەڵکو بە قوربانیدانی بەردەوامی بە ژیانی تایبەتی خۆی و خانەوادەو نزیکانی، سەلماندی ئەوو سەرکردەو سەربازە ڕۆح لەسەر دەستە هاوڕێکانى هەر بەڕاستی نوێنەری ڕاستەقینەی کێشەی ڕەوای فەڵەستینن، بەخشینی ڕۆحیشی بە ڕێگەو ڕێبازو بیروباوەڕەکەی، لوتکەی کۆتاییەکی پڕ لە خێرە کە هەموو سەرکردەیەک پێی ناگات تەنها ڕاستگۆکان نەبن.
قەوارەی داگیرکاری زایۆنی، لە ماوەی نزیکەی نۆ مانگی ڕابردووداو پاش (تۆفانى ئەقسا)، سەرەڕای کوشتن‌و بریندارکردنی هەزاران ژن‌و منداڵ‌و ئاوارەکردنی زیاتر لە دوو ملیۆن فەڵەستینی و تەقاندنەوەو خاپوورکردنی هەموو شوێنێک کە بۆنی ژیانی لێبێت لە نەخۆشخانەو قوتابخانەو مزگەوت‌و کارەباو ئاوی خواردنەوەو خانوو و ماڵی هاووڵاتیان، دواجار شکستی خوارد لە شکاندنی ئیرادەی گەنجە بەرگریکارە فەڵەستینیەکان، بۆیە وەک گورگێکی برسى بە ئاشکرا هەموو بنەمایەکی یاسایی‌‌و دیبلۆماسی‌‌و نێودەوڵەتی پێشێل دەکات‌و دەست دەبات بۆ وەحشیانەترین تیرۆری کەسە سیاسییەکان لە هەر وڵاتێک بن، ئەمەش تەنها بۆ داپۆشینی ئەو شکستە گەورەو ئابڕووچوونە گەورەیەی لە گۆڕەپان ڕووبەڕووی بوویەوە، ئەو شکستەى کە گەنجەکانى حەماس بە چەکى زۆر سادەوە سوپا ڕاهێنراوو پڕ چەک کراوەکەى دەستەوسان کرد لە بەدیهێنانى بچوکترین ئامانجى سەربازى، لەو شەڕەی کە تەنانەت بە پشتیوانی ڕاستەوخۆی ئەمریکاو هێندێک وڵاتی ئەوروپاش نەیتوانی بچوکترین دەستکەوت بچنێتەوەو بەهۆی ئەو جینۆسایدەشی بەرانبەر گەلی فەڵەستین ئەنجامیدا زۆر زیاتر لە جاران لای گەلانی ئەوروپاو ئەمریکاش ڕووی ڕاستەقینەی دەرکەوت، ئەوەی کە ئەم قەوارە زایۆنیە قەوارەیەکی شەڕەنگێزی منداڵ کوژەو شایستەی مانەوەو پاڵپشتى نییە.
ئەگەرچی شەهید بوونی هەر کەڵە پیاوێکی ئازادیخوازی وەک هەنیە زیانێکی گەورەیە بۆ بزووتنەوەى ڕزگاریخوازى فەڵەستینى و هەر ئازادیخوازێکى دونیا، بەڵام مێژوو سەلماندوویەتی کە هیچ بیروباوەڕێک بە مردنی پیاوەکانی نامرێت، بگرە هێزو وزەی بەرەنگاریى لە دەروونى گەنجەکاندا زیاتر دەکات، بەتایەبت گەلى فەڵەستین کە ڕاهاتوون لەگەڵ شەهید بوونى سەرکردەکانیان لە بزووتنەوەى بەرگرى ئیسلامى (حەماس).
پیرۆزتبێت ڕاستگۆیى لەگەڵ بیروباوەڕو گەلەکەت مامۆستاى تێکۆشان، ئیسماعیل هەنیە، دڵنیابە شارستانێتیە ساختەو لەرزۆکە خوێنڕێژەکان کۆتاییان نزیکە.
عومەر گوڵپی
٣١ی ٧ی ٢٠٢٤
وتارى پەیوەندیدار:
ـ ڕۆژى پووچەڵبوونەوەى درۆکان! (لێرە) کلیک بکە.