چەندین ساڵە زۆرێک لە شارەکان کێشەی ئاوی خواردنەوەیان هەیە، وەک دەربەندیخان، چەمچەماڵ و هەولێرو هێندێک گەڕەکی نوێ چ لە هەولێر یان سلێمانی یان سنوری دهۆک، تەنها پاساویش نەبوونی پارەیە بۆ تەواوکردن و دروستکردنی پڕۆژەی ئاو بۆیان، ئەگەر نرخی بازرگانی کارەبایان بۆ بچێتەسەر، ئەوە ئاسانترین ڕێگە بۆیان ئەوەیە بڵێن ئەوە کۆمپانیا دەهێنین بە نرخێک ئاوی خواردنەوەتان بۆ دابین بکات لەوەی ئێستە هەرزانتر بکەوێت کە بە تەنکەر دەیکڕن!
لە شاری سلێمانی کە بە حساب وەک هەولێرو چەمچەماڵ کێشەی ئاوی نییە، کەچی لە هاویندا سێ ڕۆژ جارێک تەنها دوو سەعات ئاو بۆ ماڵان هەڵدەکرێت! ئەویش ئەگەر هیج کێشەیەکی کارەبا یان شکانی بۆری ڕوو نەدات، دەکرێت بڵێن وەرن ئاوی خواردنەوەتان بۆ دەکەین بە بەردەوام و ٢٤سەعات، تەنها مانگانە (٥٠ تا٦٠ هەزار) دینار پارە بدەن؟
چەند ساڵێک لەمەوبەر، کۆمەڵێک کۆمپانیایان هێناو پێوەری ئاویان لەسەر هاووڵاتیان ساغ کردەوە، بە پاساوی ئەوەی ڕێژەی پێدانی ئاو بە هاووڵاتیان زۆر زیاد دەکات، ئەگەرچی من لەگەڵ بەستنی پێوەری ئاو بووم و تا سەر ئێسقان دژی بە زایەدانی سامانی گشتیم، لە بابەتی پێوەر دژی ئەوەبووم کە کۆمپانیا بیکات و ئەو سزا زۆرەش هەبێت بۆ نەبەستنی، کەچی پاساوەکەیان نەوەک ڕاست نەبوو، بەڵکو بەهیچ جۆرێک پێوەرەکە نەبوویە هۆی زیادکردنی یەک لیتر ئاو بۆ هاووڵاتیان، تەنها کۆمپانیا قازانجی کرد!
ئاوی خواردنەوە، کارەبا، قوتابخانە، نەخۆشخانە، ڕێگای سەرەکی، ئەمانە خزمەتگوزاریی گشتین، مرۆڤ بەبێ ئەم خزمەتگوزارییانە ناتوانێت بژی، بۆیە پێویستە لەسەدا سەد لەژێر کۆنترۆڵی حکومەتدابن و بە نرخی حکومی بن نەوەک بازرگانی، تەنانەت ئەگەر بەش یان قۆناغێکی بەرهەمهێنان یان بەرێوەبردنیان بسپێردرێت بە کۆمپانیا دیسان دەبێت بە یاساو لەژێر کۆنترۆڵی تەواوی حکومەت و هەر بە نرخی حکومی بن بە جۆرێک هەموو هاووڵاتیەک بتوانێت بەشی پێویستی خۆی بەکاریان بهێنێت، ئەگەرنا کارەسات بۆ ژیانی هاووڵاتیان دروست دەبێت بەتایبەت خێزانە ئاسایی و هەژارەکان!
بۆیە دەبێت هەموو دژی نرخی بازرگانی بین بۆ خزمەتگوزاریی بنەڕەتی بەهەر پاساوێک.
عومەر گوڵپی
٤ی ٤ی ٢٠٢٥