" لە وەڵامی ئەم داواکارییە بە ڕووخسار ئاسانەدا، کاک ئەحمەدی موفتیزادە وتە مێژووییەکەی خۆی دەڵێت، کە بۆخۆی مێژوویەکی لەسەربەرزی تۆمارکردو هەر بەو وتەیە سەقفی ئومێدی دەسەڵاتی ئێرانی ڕووخاندو بۆ هەمیشە نائومێدی کردن، لەمبارەیەوە پێشنیاریانکرد کە ئەگەر ئامادە نیە واژۆی بەڵێننامەیەک بکات تا لە زیندان ئازادی بکەن، با سەردانێکی ئاغای مونتەزەری بکات کە دۆست‌و ناسراوی خۆیەتی، بەڵام لە وەڵامدا کاک ئەحمەدی موفتیزدە دەڵێت:" من ئاغای مونتەزەری بە ڕاستگۆتر دەزانم لە ئێوە، ڕقیشم لێی نیە، ئەگەر لە دەرەوەی زیندان بوومایە ڕەنگ بوو سەردانیم بکردایە، بەڵام ئا ئێستا ئاغای مونتەزەری بێت بۆ سەردانم بۆ ناو زیندان، من ناچم بۆ سەردانی، چونکە غروری ئێوەی پێ زیاد دەبێت".
" هەروەها لەبارەی پێشنیاری ئەوەی شتێک بنوسێت وەک بەڵێننامەو پەشیمانی لە بیروباوەڕو کارەکانی ڕابردووی تا دەسەڵاتی ئێران پاش (١٠) ساڵ لە زیندانی ئازادی بکات، موفتیزادە بە دەسەڵاتدارانی وت:" من لەبەر (لا اله الا الله) گیانی خۆم دەبەخشم، بەڵام ئەگەر ئێوە لەسەر کاغەزێکی سپی بنوسن (لا اله الا الله) من واژۆی ناکەم، چونکە غروری ئێوەی پێ زیاد دەبێت"!
ئەم دوو پەرەگرافەی سەرەوە وتەى زاناو خەباتکارو تێکۆشەرو زاهیدو خواناس‌و شاعیرو زمانزان‌و نیشتیمانپەروەری کورد کاک ئەحمەدی موفتیزادەن، ئەو پیاوەی هەموو تەمەنی خۆی بەخشی بۆ ئەوەی گەلی کوردو تەواوی گەلانی ئیران بە خێرو خۆشی‌‌و ئاشتی لە سایەى سیستمێکى دادگەرانەدا سەربەرزانە بژین.
موفتیزادە بێجگە لە شارەزاییە قوڵەکەی لە زمانی کوردی، کلتوری کوردی، زانستە شەرعیەکان‌و تەفسیری قورئان، لە هەمانکاتدا بە کردەوە سەلماندی ئەو ڕابەرو تێکۆشەرێکی بێ وێنەشە بۆ گەلەکەی، هەموو تەمەن‌و ژیان‌و ڕۆحی لەو پێناوەشدا بەخشی.
کاک ئەحمەد ئەگەرچی هێشتا خەندەکانی بە شەقامەکانی شارە خۆشەویستەکەی سنەدا پیاسە دەکەن و تەڕ تەڕن، وتەکان‌و شوێنپێ‌و هەنگاوەکانی لە مەریوان و پاوەو کرماشان‌و جوانڕۆ هێشتا دەدرەوشێنەوە، بەڵام بە هەڵوێستە گەورەکانی‌‌و بە خەبات‌و تێکۆشانە نەپساوەکەی خۆی کردە یەکێک لە هەرە سەرکردە گەورە مێژووییەکانی ئێمەی گەلی کوردی بێ دەوڵەتی بێ کیانی چەوساوە.
ئەو مرۆڤ و تێکۆشەرە مەزنەى گەلى کورد، هەموو تەمەنی خۆی بەخشی بۆ ئەوەی ستەمی نەتەوەیی‌‌و مەزهەبی‌‌و چینایەتی لەسەر گەلی کورد لە ڕۆژهەڵاتی کوردستان لابەرێت، ئەو بێجگە لەم سێ خواستە گەورە بۆ کوردستانی ڕۆژهەڵات، لە هەمانکاتدا ئەیویست شۆڕشی گەلانی ئێران لە ساڵی ١٩٧٩ دژی ڕژێمی گەندەڵ‌و خوێنڕێژی پاشایەتی بەرهەمەکەی بۆ هەموو گەلانی ئێران بێت بەبێ جیاوازی ئاینی‌‌و مەزهەبی‌‌و نەتەوەیی، لە هەمانکاتدا شۆڕش و ڕابەرو سەرکردەکانى شۆڕش دەوڵەتێک بونیات بنێن بە واتای وشە دەوڵەتی مرۆڤبوون بووبێت، لانکەیەکی ڕاستەقینەبێت بۆ هەموو ئازادیخوازانی دونیا.
لە ڕاستیدا موفتیزادە بە کردەوە سەلماندی ئەو مرۆڤێکی خوا ویستەو شوێن دونیاو پارەو ماڵ‌و پلەو پۆست نەکەوت، بە کردەوە سەلماندی کە هەموو کەسێکی خۆش ئەوێت، تەنانەت بە چاوی سۆزو بەزەییەوە سەیری ئەوانەی کردووە کە لە زینداندا ئازاریان داوە، لە ئاستێکی بەرزداو بە زمانێکی فریشتە ئاسا هەوڵیداوە ئیسلام بگەیەنێتە دڵی بێ باوەڕان، بەر لەوەی بە زمان پێیان بگەیەنێت بە ئاکارو هەڵسوکەوتە مرۆڤانەییە پڕ خۆشەویستیەکانیەوە گەیاندوویەتی، هەر بە هەمان وتەو کردەوەى شیرین و مرۆڤانەش لەگەڵ نەیارەکانی دواوەو هەوڵیداوە تێیان گەیەنێت کە ئەوەى ئەوانە دەیکەن هەڵەیەو لێشى پەشیمان دەبنەوە، ئێستە پاش (٤٥) ساڵ لەو مێژووە دەرکەوت موفیتزادە بیر تیژو دوور بین بوو و نەیارەکانى هەڵەکارن.
موفتیزادە هەموو تەمەنی خۆی بەخشی بۆ ئەوەی کەسانێک پەروەردە بکات کە بە کردەوە مسوڵمان‌و شوێنکەوتەی پێغەمبەری خوا (درودی خوای لەسەر)بن، بە کردەوە دڵسۆزی نیشتمان‌و شارو وڵاتەکەیان بن، بە ڕەفتاریان دەستپاک‌و دەمپاک‌و داوێن پاک‌و بۆ خوا سوڵحاو بن‌و چاکەو خێرو خۆشیان بۆ هەموو مرۆڤایەتی بوێت.
ئەو ئامادە نەبووە تەنانەت هیچ سیمایەک بپۆشێت یان بەرکاربێنێت کە لە خەڵکى مسوڵمان و خەڵکە هەژارەکەى کۆمەڵگەکەى جیای کاتەوە، دژ بوو بە زایەدان و کەسابەتى حەرام بەهەر ناوێکەوەو هەر کەس بیکات، ئەگەرچى بەهۆى میراتیەوە تواناى دارایى باشبووە، بەڵام بە کردەوە وەک هەژارەکانى گەلەکەى ژیاوەو کاتێک وەفاتى کردووە تەنها لێفەو دۆشەکەیەکى کۆنەو عەینەکێک و کۆت و شەڕواڵێکى لێ بەجێماوە کە لە ئانیشکەکانیدا دڕاو بووە.
نامەوێت بەهۆی باسکردن لە ژیان‌و تێکۆشان‌و هەڵوێستە گەورەو گرنگەکانی کاک ئەحمەدی موفتیزادە خوێنەر لە چێژی خوێندنەوەی خودی کتێبێکى شایستە بە ژیانى ئەو کەڵە پیاوە دوور خەمەوە، بۆیە پێشنیار دەکەم بۆ هەر کوردێک، هەر مسوڵمانێک، هەر مرۆڤ دۆستێک، هەر خوێنەوارێک، کتێبی (ئەحمەدی موفتیزادە، سەرکردەیەکی کاریزماو قوتابخانەیەکی کرداریی) بخوێنێتەوە، کە برای بەڕێز مامۆستا سەروەت عەبدوڵڵا نووسیویەتی‌‌و ئامادەی کردووەو لە دوو توێی (٨١٥) لاپەڕەدا ساڵی (٢٠٢٢) چاپکراوە، لە ڕاستیدا بەم کارەی، کاک سەروەت شاکارێکی ئەنجامداوە لە تۆمارکردنی ژیانی کەڵەپیاوانی گەلەکەمان.
هەزاران ڕەحمەت لە گیانى پاکى ئەو ڕێبەرە گەورەیە، دڵنیام پاداشتى ئەو هەموو ئازارو ناڕەحەتی و بەخشندەیی و زانست و خەبات و تێکۆشانەى بۆ دینەکەى و گەلەکەى تەنها بە خواى باڵا دەست دەدرێتەوە، خوایە پلەى بەرز بکەیتەوە لە بەهەشتەکەى خۆتدا، ئامین.
عومەر گوڵپی
٣ی ٣ی ٢٠٢٣